Монголын геологийн холбоо болон БНСУ-ын геологийн холбооны хамтарсан хээрийн аялал 2025 оны 8 дугаар сарын 6-наас 10-ны өдөр хүртэл 4 өдрийн турш Монгол орны говийн бүсэд амжилттай зохион байгуулагдаж өндөрлөлөө. Тухайн аялал нь 2024 оны 08 дугаар сарын 25-31-ний өдрүүдэд БНСУ-ын Бусан хотноо зохион байгуулагдсан Олон улсын геологийн 37 дугаар конгрессийн үеэр байгуулсан Монголын Геологийн холбоо, БНСУ-ын Геологийн холбоотой “Харилцан ойлголцлын /хамтын ажиллагааны/ санамж бичиг” (MOU)-ийн хүрээнд зохион байгуулагдсан юм.

Хээрийн аялалд БНСУ-ын геологийн холбооны 17, Монголын геологийн холбооны 16, нийт 33 төлөөлөл оролцож Монгол орны говийн бүсийн геологийн тогтоц, тэдгээрийн онцлогийн талаар танилцуулга хийж, харилцан туршлага солилцсон. Хоёр орны судлаачид 4 өдрийн турш хээрийн нөхцөлд танин мэдэхүйн судалгааны ажил гүйцэтгэж, орой бүр геологийн шинжлэх ухааны илтгэл танилцуулж, хэлэлцүүлэг хийснээрээ онцлогтой аялал болсон. Монголын геологийн холбооны хувьд гадаад харилцааны нэгэн шинэ хуудсыг нээсэнээрээ ихээхэн ач холбогдолтой аялал боллоо. Аялалыг зохион байгуулахад гүн туслалцаа үзүүлсэн МГХ-ны УЗ-ийн гишүүн МУ-ын зөвлөх геологич Д.Ганбат, С.Мөнхбадрах /2019-2024/, Н.Байгалмаа болон МУ-ын зөвлөх геологич С.Оюунбат, С.Оюунгэрэл нартаа талархал илэрхийлье.